Andreas Sørensen (1919-1994) voks opp med foreldra på Stupeneset. Midt på 1930-talet var han ei tid mannskap på ishavsskuta Polhavet. Etter 2. verdskrigen dreiv han fiske med båtar som Terten, Havbryn og Havmann. I 1960-åra hadde han hyre som stuert om bord i eit par av kartverket sine farty, så som BP 26. Kring 1970 gav Andreas opp sjølivet. Han gjekk eit sveisekurs på Gjermundnes Landbruksskule i Romsdal. Sidan den tid arbeidde han på Vartdal mekaniske verkstad, populært kalla Mekken, til han vart pensjonist.
Andreas var gift 1944 med Gudrun Slinning frå Ålesund. Gjennom dei neste ti åra vart dei foreldre til Jan Arne, Sigmund, Gunvor [Dybvik], Atle og Marit [Standal]. I 1949 fekk dei frådelt ei hustomt nokre hundre meter frå barndomsheimen på Stupeneset, der dei i 1950 bygde hus og heim.
Andreas Sørensen på Vartdal mekaniske verkstad, ca 1971. Foto: Arnfinn Vartdal.