Ole J. Vartdal (1891-1959) var frå Pegarden Sørevartdal. Han var ein høgvaksen ungdom som fekk rom om bord i «Eystein», ein 92 fot lang fiskedampar heimehøyrande i Ålesund. Det kan ha hatt samanheng med at Laurits Vartdal var skipper på «Eystein» frå 1905 eller -06. Kor som er, i lag med Laurits og fleire unggutar frå bygda var Ole i 1912 med å koste havfiskebåten D/S «Ramoen», den fyrste i sitt slag på Vartdal. Våren 1918 vart «Ramoen» seld med stor forteneste. Fire år seinare gjekk Ole med i familieforetaket Vartdal Fiskeriselskap.
Ole tok i si tid over halve farsjorda, og var den som vart sitjande i heimetunet. På 1930-talet var han ein periode medlem i fattigstyret i Vartdal kommune, tiåret etter var han med i Vartdal jordstyre. Kring 1947 var han ein av dei fyrste i bygda som kjøpte mjølkemaskin. Ole var trass i mykje sjukdom som råka han, eit uvanleg arbeidsmenneske og inntil for få veker sidan, kunne dei sjå han i fullt arbeid, anten heime på garden eller på notbøteriet.
Ole var gift 1916 med Anna Brekke frå Almestad i Sande. I tida 1917-27 vart dei foreldre til 4 born: Arne, Mary, Jarle og Rolf. Arne døydde knapt 20 år gammal av lungetæring. Jarle og Rolf vart verande vartdalingar, Mary var gift Aarseth, budde i Halkjelsvik i Volda.
Ole J. Vartdal som 17-åring. Fotograf Enok O Simmoæs: Kjelde: Fylkesfotoarkivet.mr.