Ola Kvien (1904-1989) var frå Nedste-Kvia. Åra 1924-26 var han formann i Årsetdalen skyttarlag, deltok på utanbygds skyttarstemne. I 1929 kjøpte han og brørne Elling og Ole A. Myklebust ein personbil av ein kar frå Vestnes, bilen var den fyrste i Årsetdalen. Same året fekk Ola løyve av Vartdal kommune til å køyre bil på vegane i Vartdal. Ei tre år seinare fekk Ola også løyve til å køyre bil i Ørsta, Volda og Hjørundfjord. Då hadde han kjøpt eigen bil, ein Ford personbil med kjenningsnummeret T-1524. Etter andre verdskrigen skaffa han seg ein Chrysler 1936-modell, som han i 1955 baud til sals. Ola var ein driftig bondemann. Han stilte ut dyr på fesjå i 1937, to år seinare deltok ha på marasjå. I 1950 hadde han fem mjølkekyr, samla den beste buskapen i fjøskontrollaget for Vartdal og Håvoll. Gildaste kua då heitte Vigdis. År 1952 hadde Ola den niande høgstytande buskapen i Møre og Romsdal. Kyrne var av «rasen» Sør-og Vestlandsfe, han hadde også Vestlandsk raudkolle. På storfesjået 1960 fekk Ola fyrstepremi for kyrne Gullvon og Gullmøy. Jamsides gardsdrifta laga han hesjestaur og skorer, også som salsvare. Sist i 1960-åra tok han til med å lage treskrin og skeier av dyrehorn. All sin dag han del i bygdelivet. Han var aktiv losjemann i Vartdalingen, medlem i det kommunale skogrådet og i den kommunale trafikknemnda. Ei tid var han formann i bondelaget, dessutan medlem i fattigstyret, formann 1948. Sundag 4. juli 1948 var han vegvisar då den landskjende historikaren Andreas Holmsen var på synfaring til Den julianske borg. På sine eldre dagar var Ola 1977-80 og 1983-? formann i Vartdal pensjonistlag. Pensjonisttida nytta han elles til å gjere meiningsmålingar for Norsk Gallup. Han reiste då rundt i bygda og intervjua folk. Kanskje var han ikkje alltid så velkomen, ettersom han kunne vere nokså langpratande. Ola var gift med Aslaug Myklebust frå Toregarden der, dei vart foreldra til Leiv, Kjartan og Bodil.
