Ivar L. Aarskog (1921-1978) voks opp i Follestaddalen i Ørsta, faren Lars Aarskog var lærar der i meir enn to tiår. Tidleg i 1940-åra flytta Ivar til Nørevartdal-bygda. Saman med broren Einar og syskenbarnet Kåre Ødegård dreiv dei med småindustri i kjellaren til onkelen Laurits Aarskog. I 1947 starta dei opp ein møbelfabrikk på Øydgarden. Ei vårnatt i april 1951 brende fabrikken ned. Fabrikken var ikkje forsikra, så dermed kom ikkje drifta i gong att. Ivar, kona Kjellaug og eittåringen Lidvar flytta til Sykkylven, der Ivar arbeidde på møbelfabrikkar. Fyrste tida på Straumgjerde, seinare på Tynes Møbelfabrikk. Ei tid var han tilsett hos ein målingsfabrikk i Hundeidvika. I 1954 fekk Ivar skaffa seg ei tomt i bakkeskråninga framom Åbakken i Nørevartdal, utskilt frå Sæssnilsgarden. Over eit par år fekk Ivar bygt ein tomannsbustad, Høgtun, med eit kjellarlokale meint for industri.
Ivar var ein tiltaksam og optimistisk innstilt kar. Han gjekk kurs på Teknologisk institutt i Oslo, for å lære korleis ein kunne framstelle plast-produkt. Ein annan læretur gjekk til ein BASF-fabrikk i Tyskland der han gjorde seg kjent med stoff som polyester og glasfiber. Heime i kjellaren på Høgtun eksperimenterte han med dei nye materiala, mellom anna forma han garn-dobl i polyester. I eit naust på Øydgarden laga han små joller i glasfiber. Ved sidan av kjellardrifta, var Ivar innimellom engasjert av Sunnmøre småindustrikontor for å vere praksislærar i bygging av plastbåtar, heldt kurs i Sykkylven og visstnok i Sunnfjord.
Ikring 1957-58 var Ivar som vaksenperson ansvarleg for Guteklubben Isflå, eit tiltak der Jo-Ivar skal ha vore som ein leiar for gutane. Her lærte dei å flette korger av bast og peddik, med meir.
Hausten 1963 byrja Ivar i vaktmeister-stilling ved Sjømannskyrkja i Le Havre, kona Kjellaug og dottera Aase Iren arriverte Frankrike sommaren 1964. Frå 1974 fekk han ny tenestestad ved Rotterdam europort. År 1977 flytta han og Kjellaug heim til Høgtun og Nørevartdal. Ivar var frå ung alder plaga av diabetes-sjukdom, døydde brått våren 1978.
