Johannes Guttormsson Myklebust (1827-1910) var odelsgut til Guttormegarden på Myklebust og tok i si tid over gardsdrifta etter faren. Guttorme-Johannes var ein «noke sermerkt mann» skriv L.K. Grønnevet, på «fleire måtar noke lik» syskenbarnet Tore-Ola (Ola Knutsson Myklebust). Johannes var den eldste av fire brør og fire systrer – «kosta seg tidleg sunnmørsbåt og var styremann i lang tid til han ga volen frå seg til sonen. Han [=Johannes] var i mange måtar ein høvding på land og sjø, for han var berre det beste godt nok, anten det var båten hans eller hus og garden hans heime». Nemninga «sunnmørsbåt» må her kunne gjelde både ein seksring og seinare ein ottring, og truleg også ein båt av møringstypen.
Johannes gifte seg sommaren 1860 med Dorte Anderssdotter frå Bjørdalsbakken i Ørsta, ho voks for ein stor del opp på Ulset i Hareid. Dei fekk sonen Guttorm, og seinare ein gut til som døydde straks etter fødselen. I 1890-åra var Johannes ein av dei i Vartdal som betalt mest skatt. Eitt døme på at han stod seg godt i pengevegen, er at han i 1872 kjøpte Olagarden i Kvia for 450 spesiedalar (= 1800 kroner). Fram til 1900, då han selde garden til Kvie-Lars, brukaren, var han jordeigar. I desse åra ytte/betalte brukaren av Olagarden skyld til Johannes. Flaks for brukaren av Olagarden at det var så kort veg heim i Guttormegarden, Grønnvet-Knut og mange andre vartdalingar måtte på 1800-talet årleg ro inn til Solnør i Skodje med skylda si.