Med 1925-åringane vert det her sikta til borna som vart fødde i Vartdal herad i året 1925, samt dei personane fødde andre stader same året som vart vartdalingar, gjennom eigne eller andre sine val.
DEI INNFØDDE
Arne L Masdal, Erling R Sætre, Petter I Vartdal, Peder R Masdal, Arvid Remmen, Kjartan Buset, Ingebjørg Berg (Masdal), Astrid Barstad (Vartdal) og Bjørg E Rot vart verande vartdalingar livet ut. To av desse døydde i barndomen og ein tredje i tenåra. Petter i Jogarden Nørevartdal strauk med av lungebetennelse før han fylte året. Bjørg på Nedste Rot fekk poliomyelitt og døydde på Ålesunds sjukehus, drygt 7 år gammal. Arne L Masdal vart råka av hjernehinnebetennelse påska 1942, han anda ut i heimen i Nørevartdal.
DEI INNFLYTTE
Jørgen Olsvik var fødd i Hareid. Han fylgde mor si, enkja Liv, då ho gifta seg med brukaren i Heimste-Øye i 1932. Etter andre verdskrigen kom Gudrun Heimsæter (Sætre) frå Hyen i Nordfjord, Sofie Johansen (Vartdal) frå Kvæfjord i Troms og Johanne Hatlø (Vartdal) frå Ulstein.
DEI UTFLYTTE
Jofrid Vartdal (Vatne) og Lars S Masdal vart ørstingar. Ein liten skokk kryssa Storfjorden i nord. Else Sætre (Eikremsvik) og Marta Sætre (Fiskerstrand) hamna i Sula, medan Arne S Barstad og Kjellaug Vartdal begge levde ugift i Borgund. Også Ingvard Roth enda livsferda i det som hadde vore Borgund kommune. Asbjørn Bortne og Rannveig Barstad (Sæther) busette seg i Ålesund kommune. Målfrid Myklebust (Longva) bygde heim i Brattvåg. Då står att å nemne dei som flytta vekk frå Sunnmøre. Ingegjerd Barstad (Johansen) fekk heim på Rena i Hedmark, Kåre Hilde budde i Asker i Akershus og Eldbjørg Rotnes (Dalen) hamna på Skotfoss i Telemark.
Arvid Remmen vart den som levde lengst av våre 1925-åringar. Han døydde våren 2024.