Stine Simonsdotter Barstad var ei av desse kvinnene som ettertida har tapt minne om. Ho vart fødd for 200 år sidan, 5. mai 1825, som den yngste av fem systrer i Larsgarden Volle. Opplysninga om fødselsdato har ein frå den kyrkjeboka som i 1833 førte inn vitale persondata om ganske mange av dei som då levde i Ulstein prestegjeld. Brannen 1832 i prestegarden i Dimnasund slukte mellom anna alle kyrkjebøkene. Det må vere far eller mor til Stine som opplyste soknepresten om når ho vart fødd. Ein veit inkje om Stine før ho i 1862 vart vigd til Jon Kristensson Barstad i Ingridgarden. Han var då ein ugift sjølveigar-bonde, 13 år yngre enn Stine. Korfor han som 24-åring gifte seg med Stina, kan ein ikkje anna enn spekulere. Det er lite truleg bygda rekna henne for å vere eit godt gifte. «Tradisjonen seier at dei fekk 2 born, som døydde medan dei var små», seier Vartdalssoga I. Lagnaden ordna det slik at Stine døydde på 57-årsdagen. Fire dagar seinare vart ho gravlagd, heilt sikkert nær kyrkjeveggen, ettersom det i 1882 ikkje var ordna med kyrkjegard.