Meny Lukk

Folk frå fortida – Hans I. Vartdal

Hans I. Vartdal (1912-1976) var gardbrukar i Sæssnilsgarden etter faren Ivar H. Vartdal døydde i 1939. Hans var fiskar frå ung alder, ganske sikkert tok han til i yrket om bord i dekksbåten Isflåmann. I 1934 skaut han inn pengar då fiskedamparen Norholmen vart kosta. Fram til slutten av 1950-åra deltok han nok oftast årleg i sildefisket som mannskap på Norholmen.

Hans tok jamt del i bygdestyringa. Såleis var han 1940-42 med i styret for trygdekassa, også fleire år i styret for boksamlinga i Nordre Vartdal. Etter fleire år som nestformann i Vartdal skulestyre, var han formann i same frå januar 1952 til januar 1954. Seint i 1953 kjøpte Vartdal kommune skuletomt fremst på eigedomen hans Hans. Her vart den nye Nordre Vartdal skule reist i 1954-55, ein skule som var i drift til bygda mista skulen i 2004. Kommunen trong sand til bygdevegane, så Hans baud allereie kringom 1940 sand og lessing frå Åbakken, nær Sæssnilstunet. To grustak vart opna, begge stadene viste seg å ha vel mykje leire i sanden. Perioden 1956-59 var Hans varaordførar i Vartdal kommune.

Midt på 1950-talet selde Hans merra si. Han kjøpte ein brukt Massey-Harris-Ferguson 1954-modell. Denne bensintraktoren bytta han ut hausten 1959 med ein brukt Massey-Ferguson som gjekk på diesel. Sonen Kjartan var med å hente traktoren i Volda. I dei dagar nytta dei traktorane berre i sommarhalvåret, vintrane stod dei i opplag.

Påska 1942 gifta Hans seg med Solveig Vartdal frå Larsgarden Sørevartdal. Giftarmålet feira dei på Ose Hotell i Ørstavik. Fram til 1955 vart dei foreldra til Ingunn, Per Inge, Reidar, Kjartan og Geir. Hans spelte fele, opptrådde i yngre år både åleine og i duettar med svogeren Olav Myklebust.

Siste åra Hans levde, ringnast helsa. Han døydde i heimen ein aprildag i 1976, 63 år gammal. Hans var ein roleg, forsiktig kar som det ikkje fylgde mykje ståk med.