Hans Hansson Erdal (1820-1875) var yngst av dei seks borna JoPe-Hans på Årskog fekk med andrekona Marte Jonsdotter. Hans må ha synt interesse for det boklege, iallfall vart han plassert øvst på kyrkjegolvet då han i oktober 1836 vart konfirmert i den gamle Hareids-kyrkja. Frå 1840 arbeidde Hans som omgangsskulelærar på Vartdalsstranda. Sommaren 1854 gifta han seg med jamaldra Jakobine Ellingsdotter. Ho var enkje etter Ola Andersson Erdal som omkom i Storelva i 1852. Jakobine sat då att på ein einbølt og vidsveimt gard med sine fire born. Dei neste åra dreiv Hans Erdals-garden, eit gardsbruk som i 1865 fora 17 storfe og 20 sauer, attåt ein øyk. Perioden 1859-64 var han elles på ny skulemeister. Ettermælet har gått på at han var ein dugande lærar, men noko streng. I 1870 skøytte Hans garden over på eldste son til Jakobine, Anders Olsson Erdal. Hans døydde barnlaus 26. september 1875.