Peder O. Myklebust (1872-1923) var odelsgut til Bakkegarden der (Vartdalssoga I:534). På 1890-talet var han minst ein sesong i arbeid på Bodø Teglverk. Han var aktiv i det lokale ungdomsarbeidet som blomstra opp i 1890-åra, i 1897 utsending til eit ungdomsmøte i Ålesund. År 1898 kosta han dekkskøyte i lag med granneguten Knute-Laurits og Grønnevet-tvillingane Laurits og Andreas. Våren 1900 gifta han seg med Petrine Berntsdotter frå Årset. Dei to eldste borna deira, Olav og Bjarne, og yngstemann Leiv, var vartdalingar livet ut, medan Gina [Thonhaugen], Einar og Håkon busette seg andre stader. 50 år gammal døydde Peder av «Astma» den 16. april 1923 «i tru paa Jesus». «Vert gravlagd laurdag» melde dødsannonsen, som dødsdagen stod i Sunnmørsposten (avisa kom den gongen ut om ettermiddagen).
