Edvard Barstad (1877-1962) var frå Ivagarden Vollane. Han gifta seg med jordajenta på Barstad 2/Bøen, Johanne Johannessdotter. Dei vart velsigna med mange born, 9 i talet. Av desse tok eldstemann Johannes over ættegarden, medan Paula gifta seg med Anders N. Barstad. Karen [Blindheim]] og Rolv busette seg i Sykkylven, Borghild [Follestad] i Ørsta. Dei hine borna flytta vidare i landet.
Edvard var medeigar i ei dekkskøyte til 1907. Han gjekk ut som partseigar då det vart sett motor i båten. I staden var han ei tid fiskar med dampbåten «Skolma». År 1914 kjøpte han og sambygdingane Nils O Barstad og Nils Romestrand ein 42 fot lang båt som lasta om lag 100 mål (150 hl) sild. Båten, som då mangla rorhus og ratt, vart kalla «Sleipner». Edvard var skipper, han «stod bakom kappa ned til motoren og styrde med to taljar» står det å lese i Vartdalssoga II:276, tidvis våtsamt, må vite. «Sleipner» hadde ein 18-hestars Avance-motor då han vart kjøpt, andre året fekk eigarane sett inn ein Hein-motor på 10-12 hk. Hausten 1915 lyste Edvard ein «8 hestes Gideonmotor» til sals. Kvar denne kom frå er uklart, kanskje skaffa dei denne før dei fekk hand om Hein-motoren.
Legg merke til øyredobbane, Edvard var ikkje åleine teglverks-arbeidande vartdaling som utstyrte seg med denne pynten i Bodø.
