I andre halvdelen av 1600-talet og dei fyrste tiåra av 1700-åra budde Ingebrigt Guttormsson på Myklebust. Han hadde fleire born og er ein fjern forfader til mange av dagens vartdalingar. Ingebrigt Jetmundsson Nørevartdal og Ingebrigt Olsson Romestrand, ca 65 og 60 år gamle ved folketeljinga 1801, levde nær parallelt i tida. Fyrstnemnde var morfar til Ingebrigt Steinarsson (1797-1836) i Steinagarden Nørevartdal. For 200 år sidan kunne ein elles møte Ingebrigt Persson Myklebust (1780-1856) i Pegarden, Ingebrigt Pålsson Myklebust (1801-1843) seinare bureisar på plassen Skortå på Buset, Ingebrigt Ananiasson (1801-1857) i Toregarden Nørevartdal og 4 år gamle Ingebrigt Endresson Melbø, i si tid gift med jordajenta Dorte Pålsdotter på Lynge. Den sistfødde av dei som heitte Ingebrigt og budde i Vartdal-bygdene, var fødd på Eidem i 1837. Han var plassemann under Erdal, døydde på Røssevoll i Borgund. Mannsnamnet Ingebrigt forsvann frå Vartdal då Ingebrigt Endresson Lynge døydde i 1909. Han vart oppattkalla, men dei borneborna var ikkje vartdalingar. Namnet er ei norsk avleiing av det tyske Engelbrekt.