I juni 1895 baud leiarane for heradskommunane på Søre Sunnmøre og bykommunen i Ålesund inn til ein «Aktieinnbydelse». Eit opprop formidla gjennom avisa Søndmøre Folkeblad av 6. august peika på at «Søndre Søndmøre ligger beklagelig tilbage i udnyttelsen af telefonkommunikasjonen. Denne sag er nu i god gjenge i de fleste distrikter. Paa nordre Søndmøre bygges iaar lange linjer med talrige stationer». Dei 50 underskrivne «finder nu tiden inde til at forsøge dannet et telefonsamlag for søndre Søndmøre med udgang fra Aalesund og saaledes, at man om muligt kan slutte sig sammen med allerede eksisterende telefonsamlag.» Telefonlinja var tenkt strekt frå Ålesund forbi Vegsund til Solavåg, derifrå i kabel med «to kjerner» til Festøy, langs Vartdalsstranda til Rjånes. Vidare delte ein linja i to, ei skulle gå i kabel til Eiksund med forgreiningar vidare til øykommunane og i kabel att til Vanylven. Den indre linja skulle gå til Ørsta, Volda og Hjørundfjord, derifrå kunne ein opprette samband med Sunnylven og Nordfjord. Innbydinga greidde elles ut om korleis tiltaket skulle finansierast. For Vartdal skreiv ordførar «H. Vartdal, Iver E. Rommestrand, Johannes S. Vartdal [Steina-Johans], Knut J. Buseth og Ola Erdal» under oppropet.
I mars 1899 opplyste «Rigstelefonen» at på «Rigstelefonlinjen Aalesund–Volden er aabnet Telefonstatstionerne Solevaag, Barstadviken, Vartdalsstranden, Aarsetdalen og Ørstenviken».