Ishavsskuta «Veidemann» kom til Vartdal i 1915. Skuta vart bygd i Rosendal i Hardanger av skipsbyggjarslekta Skaaluren, rigga av hovudeigaren Knut Vartdal og elles utrusta ved Storvik mekaniske verkstad i Kristiansund. Ettersom stormaktene i Europa då låg i krig med kvarandre, fekk dei vanskar med å skaffe delar til damp-maskineriet. Dermed vart det ikkje fangsttur til Vestisen det året, så jomfruturen sommaren 1915 gjekk til Strætet i staden. Sverre Volle frå Nøre-Vartdal, som tok dette biletet, var mannskap på Stræte-turen. Dette fotografiet av «Veidemann» ved bryggja hans Knut Vartdal ved elvaosen i Sørevartdal vart gjerne knipsa i høve klargjeringa.
Eigarane selde skuta til Ålesund i 1920. I juni 1922 forliste «Veidemann» i Strætet. Mest alt mannskap var vartdalingar. Alle vart berga.
